Таны гэрт, өрөөнд хөгц үүссэн бол юу хийх хэрэгтэй вэ?

Ирландын чийглэг уур амьсгал нь хөгц үүсэх хамгийн таатай нөхцлийг бүрдүүлдэг бөгөөд энэ нь олон мянган айл өрхийн өдөр тутмын амьдралд эрсдэл учруулсаар байна. Харамсалтай нь хөгц нь зөвхөн гоо зүйн хувьд тааламжгүй байхаас гадна хүний эрүүл мэндэд бодит хохирол учруулж болох аюултай юм. Ялангуяа хүүхэд, өндөр настай хүмүүс болон амьсгалын замын асуудалтай хүмүүс хөгцний хорт нөлөөнд илүү өртөмтгий байдаг. Судалгаагаар дэлхийн хэмжээнд хүүхдийн астма өвчний 14 хувь нь чийгтэй, хөгцтэй орчинд амьдарч байсантай холбоотой гэж үздэг.

Сүүлийн жилүүдэд Ирландад хөгцийн асуудал эрс нэмэгдсэн нь үүнийг нотлох баримттай тоон үзүүлэлтүүдээр харагдаж байна. Жишээлбэл, Дублин хотын төвд байрлах Oliver Bond House орон сууцны хороололд оршин суугчдын 82.8 хувь нь гэртээ хөгц болон чийгтэй орчинтой тулгарч байгаагаа илэрхийлсэн бол тэдний 55 хувь нь эрүүл мэндийн байгууллагаас “хөгцний нөлөөнд өртсөн” гэх онош сонссон байдаг. Энэ нь зөвхөн нэг бүсийн тохиолдол биш бөгөөд Ирландын олон нийтийн орон сууц, хуучин барилга бүхий дүүргүүдэд нийтлэг асуудал болоод байгаа юм.

Хөгц үүсэх гол шалтгаануудыг авч үзвэл, эхний ээлжинд Ирландын уур амьсгал онцгой үүрэгтэй. Байнга бороо ордог, агаарын чийгшил өндөртэй, сэрүүн уур амьсгал нь дотоод орчны ханын гадаргууг хүйтэн байлгаж, конденсац үүсгэх суурь нөхцөл болдог. Үүн дээр нэмээд олон сууц хангалттай дулаалгагүй, эсвэл хуучин барилга тул халаалтын систем жигд биш байдаг. Ийм нөхцөлд агаар солилцоо хангалтгүй болж, чийг хуримтлагдан хөгц үүсэхэд хүрдэг.

Зөвхөн байгаль орчин бус, барилгын бүтэц, хэрэглээний дадал ч мөн хөгц үүсэхэд нөлөөлдөг. Гал тогоо, угаалгын өрөөнд сорох сэнс байхгүй байх, хувцас дотор хатаах, цонх онгойлгохгүй байх зэрэг нь дотоод орчны чийгийг нэмэгдүүлдэг. Үүнээс гадна хананд үүссэн ан цав, дээврийн гоожилт, гадна ханаар ус нэвчих зэрэг бүтцийн алдаанууд нь илүү хүнд хэлбэрийн хөгц үүсэх үндэс болдог. Ирландын барилга байгууламжуудын дунд BER (Building Energy Rating) үзүүлэлт муутай байдал нийтлэг байдаг нь асуудлыг улам дордуулдаг.

Иймд гэрт болон өрөөнд хөгц үүссэнийг анзаарсан л бол хамгийн түрүүнд агааржуулалтаа сайжруулах шаардлагатай. Өдөрт дор хаяж 15 минут цонх онгойлгож, чийг хуримтлагддаг өрөөнүүдэд сэнс ашиглах хэрэгтэй. Хувцсыг дотор хатаахыг аль болох зогсоох, эсвэл агааржуулалт сайтай нөхцөлд хатаах нь чухал. Мөн өглөө бүр цонхны конденсацыг арчиж, тавилгыг хананд наахгүй байх хэрэгтэй. Хэрэв хөгц жижиг талбайд байгаа бол хамгаалалтын бээлий, амны хаалт өмсөөд цагаан цуу, эсвэл тусгай хөгц устгагч шингэнээр арчиж цэвэрлэж болно. Гэхдээ будгаар дарж халхлах нь түр зуурын шийдэл бөгөөд хөгц дахин гарч ирэх магадлал маш өндөр байдаг.

Хэрэв та энгийн арга хэмжээнээс гадна илүү үр дүнтэй, мэргэжлийн түвшний цэвэрлэгээ хийхийг хүсвэл Ирландын зах зээлд дараах нэртэй тусгай цэвэрлэгээний бодисууд хамгийн түгээмэл хэрэглэгддэг.

Үүнд HG Mould Spray, Astonish Mould & Mildew Blaster, Dettol Mould Remover болон Kilrock зэрэг бүтээгдэхүүнүүд ордог. Эдгээр нь хар хөгц болон хатуу толбо арилгахад тохиромжтой бөгөөд ариутгах, дахин үүсэхээс сэргийлэх найрлагатай байдаг. Цэвэрлэгээ хийхдээ зааврыг сайтар уншиж, бээлий өмсөж, өрөөг сайтар агааржуулахыг зөвлөж байна.

Эдгээр бүтээгдэхүүнүүдийг та B&Q Ireland, Woodie’s, Tesco, SuperValu зэрэг дэлгүүрүүд болон Amazon.ie, Amazon.co.uk онлайн худалдааны сайтаар дамжуулан худалдан авах боломжтой. Зарим тохиолдолд гэрийн ойролцоох эмийн сан эсвэл hardware дэлгүүрт ч зарагдаж байж болно.

Хөгц дахин дахин гарсаар байвал, эсвэл 1 м²-аас их талбайг хамарсан бол түрээслэгч бол байрны эзэнд бичгээр, зураг хавсарган мэдээлэх ёстой. Ирландын орон сууцны хуулиар, бүтцийн чийг, хөгцтэй холбоотой асуудлыг засах үүрэг нь орон сууц эзэмшигчид оногддог. Мөн зарим төрлийн хар хөгц нь хүнд хэлбэрийн амьсгалын асуудал үүсгэдэг учраас мэргэжлийн цэвэрлэгээний үйлчилгээ авч үзэх нь зүйтэй. Хэрэв гэр бүлийн хэн нэгэнд эрүүл мэндийн шинж тэмдэг илэрч байгаа бол эмчид заавал үзүүлж, хөгцтэй орчинд амьдарч байгаагаа хэлэх хэрэгтэй.

Өрөөн дотор чийгшил 60 хувиас хэтрэх ёсгүй бөгөөд хүйтэн өрөөнүүдийг дулаалж, тогтмол агаар сэлгэлт хийх нь хөгц үүсэхээс сэргийлэх чухал алхам юм. Ирээдүйд ийм асуудал давтагдахгүйн тулд агааржуулалт, дулаалга, халаалт гурвыг нэгэн зэрэг сайжруулах шаардлагатай. Хэрэв та хөгцтэй холбоотой асуудалд тулгарч, зөвлөгөө хэрэгтэй байвал mongolianstudentsireland@gmail.com цахим захиа илгээвэл танд туслахад бэлэн байна.